Aldrei fór það svo að ekki snjóaði á Selfossi. Veturinn til þessa hefur einkennst af rigningum og stormum og  rysjóttu veðri, en ekki hefur snjóað fyrr í vetur svo heitið geti. Jörð hefur hvítnað af og til, s.s. um jólin. Í gær fór svo að snjóa fyrir alvöru og urðu íbúðagötur fljótt ófærar litlum bílum. Starexinn öslaði þó í gegnum snjóinn af miklu öryggi. Það er ljúft að komast ferða sinna án þess að eiga á hættu að festa sig með tilheyrandi mokstri. Ekki það að mokstur getur verið hollur fyrir skrokkinn og ég hef að sjálfsögðu mokað að dyrum hússins og hreinsað aðeins að bílastæðinu. Gríðarmikill snjór er nú við húsið, mun meiri en sést á þessum myndum sem teknar voru í gær (þriðjudag). Spáð er hvassvirði en aðeins hefur blotnað svo ekki er víst að snjórinn fari allur á flug þó Kári klappi honum aðeins.